Ný heimasíða!

 Góðir vinir og velunnarar, þessi síða er ekki lengur í notkun. DíaMat er komið með nýja heimasíðu og þið getið séð hana hér: https://diamat.is/ -- við þökkum ykkur samfylgdina hérna, og sjáumst þar í framtíðinni!

Húsdýragarðurinn á sumardaginn fyrsta

Á fimmtudaginn er sumardagurinn fyrsti og eins og fyrri ár hefur DíaMat ákveðið að bjóða í Húsdýragarðinn. Planið er einfalt: Félagið mun borga aðgangseyri fyrir alla sem vilja, sem mæta og hitta okkur fyrir framan hliðið klukkan 10:50. (Þetta er ekki bundið við skráningu í félagið, nær bara til allra sem eru hæfir til að vera innan um börn og dýr.) Þaðan verður farið og séð þegar selirnir eru fóðraðir, og síðan önnur dýr. Við borðum saman í hádeginu og eftir það hefur hver sína hentisemi.

Athugið að ekki eru seldar veitingar í garðinum um þessar mundir. Komið því með nesti með ykkur. Við munum líka koma með eitthvað ætilegt.

Athugið líka að vegna sóttvarna eru fjöldatakmarkanir í garðinum, svo gætið að allri smitgát. Og klæðið ykkur eftir veðri.

Á sumardaginn fyrsta er afmæli allra sem telja aldur sinn í vetrum, eins og dýranna í garðinum. En það vill til að DíaMat á sjálft afmæli á fimmtudaginn, stofnað 22. apríl 2015. Við ætlum því að halda upp á það í leiðinni. Sjáumst!

DíaMat óskar eftir hugmyndum um merki fyrir félagið

 

Parísarkommúnan 150 ára fimmtudag

Parísarkommúnan 1871 var fyrsta alvöru bylting öreigastéttarinnar. Á 150 ára afmæli hennar heldur varaformaður DíaMats, Þorvaldur Þorvaldsson, framsögu um kommúnuna og lærdómana af henni.

Friðarhúsið, Njálsgötu 87, fimmtudaginn 18. mars klukkan 17:00.

Allir velkomnir sem eru húsum hæfir. Húsnæðið er aðgengilegt fyrir flesta.

Alþjóðlegur baráttudagur kvenna fyrir friði og jafnrétti

Í tilefni af alþjóðlegum baráttudegi kvenna fyrir friði og jafnrétti, sem er í dag, 8. mars, sendir DíaMat kveðjur til allra sem styðja málstað friðar og jafnréttis, og minnir á að margt er enn óunnið. Menningar- og friðarsamtökin MFÍK halda engan baráttufund í dag, eins og annars er venjan, en í staðinn ætti hver og einn að hugsa hvað sé hægt að gera í þágu friðar og jafnréttis -- já, og jafnvel fleiri þjóðrifamála.

Vésteinn Valgarðsson 

AF AÐALFUNDI

Helstu fréttir af aðalfundi DíaMats þriðjudagskvöldið 16. febrúar sl. eru að inn í stjórn komu þær Claudia Overesch og Ingibjörg Ingvarsdóttir og eru þær boðnar velkomnar, um leið og Tinnu Þorvalds Önnudóttur og Skúla Jóni Unnarsyni eru þökkuð störf í stjórn félagsins undanfarin ár. Ingibjörg var auk þess samþykkt í öldungaráð félagsins. Skoðunarmenn reikninga verða Árni Daníel Júlíusson og Skúli Jón Unnarson.

Önnur aðalfundarstörf voru að mestu hefðbundin. Væntar tekjur af sóknargjöldum verða nálægt 1,8 milljónum á starfsárinu og var samþykkt að hækka eyrnamerkt framlög í styrktarsjóð og byggingarsjóð upp í 750.000 kr. á hvorn.

Eins og sjálfsagt má segja um flest félög, hefur Covid-farsóttin haft mikil áhrif á fundahöld DíaMats á síðasta starfsári og sett flestu öðru starfi okkar skorður. Ekki gafst tími á aðalfundi til að ræða ítarlega um starfið á næstunni, svo það verður tekið upp á fundi fljótlega, ef samkomutakmarkanir leyfa.

Aðalfundur DíaMats 16. febrúar

DíaMat heldur aðalfund þriðjukvöldið 16. febrúar kl. 20:00 í MÍR-salnum, Hverfisgötu 105.

Á dagskrá fundarins eru hefðbundin aðalfundarstörf.

Húsið er aðgengilegt, fundurinn fer fram á íslensku, veitingar verða í boði og líka handspritt og grímur. Allir félagar velkomnir ... en í ljósi Covid19 skiljum við samt vel ef fólk kýs að koma ekki.

Vetrarsólstöður

 Gott fólk nær og fjær,

gleðilegar vetrarsólstöður. Í dag er stysti dagur ársins og daginn tekur að lengja strax á morgun og allt fer að rétta úr kútnum. Hafið það gott, njótið jólanna -- og hvernig væri að hringja í gamlan eða einmana ættingja?

Vésteinn Valgarðsson

Fullveldisdagurinn

Gleðilegan fullveldisdag. Það er ekki sjálfgefið að heimsækja eldri ættingja sína í dag, en það er óhætt að hringja. Munið að taka fánann niður á lögboðnum tíma.

Annars eru sóknargjöld næsta árs reiknuð út miðað við skráningu fólks 1. desember árið á undan. Þannig að ef þið hafið verið að hugsa um að skrá ykkur í DíaMat en ekki látið verða af því, þá er mjög gott tækifæri til þess einmitt núna. Farið bara á skra.is með rafrænu skilríkjunum ykkar, finnið trúfélagsskráningu og veljið DíaMat. Það er ekki flóknara en það.

Styrkur til Pieta

DíaMat styrkti Pieta-samtökin um 125.000 krónur á dögunum. Þau stunda forvarnir gegn sjálfsvígum og sjálfskaða og styðja einnig við aðstandendur.

Þessi styrkur er sá fjórði sem DíaMat veitir í haust. Önnur samtök sem við höfum styrkt eru Hugarafl, Drekaslóð og Solaris. Þau hafa öll fengið sömu upphæðina.

Styrkir DíaMats eru greiddir af þeim tekjum sem félagið fær í sóknargjöld frá íslenska ríkinu. Það er ákveðin upphæð fyrir hvern einstakling (16 ára og eldri) sem er skráður í félagið í Þjóðskrá Íslands þann 1. desember árið s undan. Ef þið viljið skrá ykkur er fljótlegt og einfalt að gera það á skra.is

Styrkur til Drekaslóðar

DíaMat var að færa Drekaslóð styrk að upphæð kr. 125.000 til að styðja við þeirra góða og þarfa starf.

Þetta er þriðji styrkur haustsins. Áður hafa Hugarafl og Solaris flóttamannahjálp fengið sömu upphæð að styrk.

Þessir peningar koma af fjárhæðinni sem íslenska ríkið greiðir DíaMat í sóknargjöld vegna fólks sem er skráð í félagið hjá Þjóðskrá Íslands.

Hafið þið skráð ykkur? Það er gert á island.is með rafrænum skilríkjum og er bæði fljótlegt og einfalt!

Styrkur til Solaris

Í gær veitti DíaMat annan styrk haustsins, að upphæð 125.000 kr. Viðtakandinn var Solaris, hjálparsamtök fyrir hælisleitendur og flóttafólk á Íslandi.

Peningarnir koma af því fé sem íslenska ríkið greiðir DíaMat í sóknargjöld, fasta upphæð fyrir hvern sem er skráður félagi. Það er fljótlegt og einfalt að skrá sig á island.is ef maður á rafræn skilríki. Hefur þú skráð þig? 

Styrkur til Hugarafls

Í gær mánudag færði DíaMat Hugarafli styrk að upphæð 125.000 krónur. Sá styrkur er veittur án neinna skilyrða, en með hugheilum baráttukveðjum. Við styrkjum góðan málstað sem er valdeflandi fyrir alþýðufólk og mun í fyllingu tímans styðja samtök alþýðunnar í að koma á betra og réttláta skipulagi í þjóðfélaginu.

Síðasti aðalfundur DíaMats samþykkti að verja hálfri milljón króna í styrki, sem deilast í fjóra jafnstóra til fernra mismunandi samtaka. Peningarnir koma frá sóknargjöldunum, sem íslenska ríkið greiðir félaginu með hverjum einstaklingi sem er skráður í það hjá Þjóðskra Íslands. Hver sem skráir sig í félagið styður starf þess og það munar um hvern einasta.

Jafndægur á hausti

DíaMat óskar jarðarbúum öllum gleðilegra jafndægra á hausti. Í dag dreifist sólarljósið jafnt um alla jörðina. Hugleiðið það aðeins. Hvað ef efnislegum gæðum, tækifærum og hamingju væri skipt jafnt?

Verkalýðurinn og COVID: díalektísk stund

Drífa Snædal, forseti ASÍ, kemur, segir frá og ræðir við fundargesti um áhrif COVID-19 á verkalýðshreyfinguna og baráttu hennar og störf.
Þriðjudagskvöldið 2. júní 2020 klukkan 20:00
Friðarhúsi, Njálsgötu 87
Allir velkomnir sem virða smitgát og eru að öðru leyti húsum hæfir.

Fundur þriðjudagskvöld

Þriðjudagskvöldið 12. maí heldur DíaMat fund um starf næstu mánaða. Þetta er díalektísk stund en um leið opinn stjórnarfundur.
Lóðarumsókn félagsins verður rædd og tekin ákvörðun um nlsta skref. Eindregið er mælt með því að fólk sem vill taka þátt í þeirri unræðu, verði búið að lesa úrskurð Umboðsmanns Alþingis frá 6. apríl áður en fundurinn hefst.

Gleðilegt sumar

DíaMat óskar öllum gleðilegs sumars.
Vegna COVID-19 hefa fundir DíaMats legið niðri undanfarið, eins og flest annað, og ekki er ljóst hvenær við höldum næst fund. Við höfum verið vön að bjóða börnum og fullorðnum í Fjölskyldu- og húsdýragarðinn á sumardaginn fyrsta (því þá eiga dýrin afmæli) en það verður líka að biða betri tíma.

Gleðileg vorjafndægur

DíaMat óskar öllum jarðarbúum gleðilegra vorjafndægra, en í dag er annar tveggja daga ársins þar sem sólarljósinu er deilt jafnt á alla jörðina.

Ljóðakvöld MFÍK 8. mars

Áttundi mars er í dag -- alþjóðlegur baráttudagur kvenna fyrir friði og jafnrétti, einn af þeim dögum sem DíaMat heldur hátíðlega. Við hvetjum félaga okkar og aðra til að taka þátt í einhverju í tilefni dagsins. Fyrir fólk sem er í Reykjavík eða nágrenni gæti til dæmis verið nærtækt að fara á ljóðakvöld MFÍK á Loft í Bankastræti kl. 20 í kvöld.

Verkaskipting stjórnar

Stjórn DíaMats hefur ákveðið að hafa verkaskiptingu stjórnar óbreytta frá því sem var.